البسلة:
جيبيها في الموسم الخاص بالبسلة وتقطعي عليها جزر مكعبات حسب الكمية اللي جبتيها حطيها بعد كدا في مية بتغلي ومعاها شوية ملح لمدة 3 دقايق وبس وطلعيها صفيها وحطيها في مية متلجة وبعدين سيبيها شوية ووزعيها علي اكياس واحفظيها في الفريزر.
ورق العنب:
تخزني ورق العنب وهو اخضر تحطي شوية ورق فوق بعض وتعمليهم رول لفة وتحطيهم في كيس بلاستيك فيلم وتخرجي منوا الهوا كويس اوي وتحطية في الفريزر عادي خالص وبعد كدا لما تحبي تستخدمية تطلعية وتسلقية كانوا لسة طازة
صلصة الطماطم:
تجيبي طماطم حمرا وتغسليها كويس اوي وتقطعيها اربع وتحطيها في حلة مع شوية ملح علي النار ورشة سكر صغيرة جدا جدا وتهدي عليها النار وهي تنزل ميتها وتستوي فيها ونسيبها لحد ما تقصر علي النار نسيبها تبرد شوية ونضربها في الخلاط ونصفيها ونعبيها في اكياس ونحطها في الفريزر.
البفتيك:
تجيبي البفتيك وتتبلية ببصل مبشور وعصير ليمون وخل وشوية زيت زيتون ومعلقة مسطردة ومعلقة صويا صوص وملح وفلفل وبهارات لحمه وقرفة ناعمة وزعتر وورق لوري وحبهان وتسيبية في التتبيلة يوم في الثلاجة وبعد كدا نبدا نحطة في دقيق وبعدين بيض ولبن وبقسماط وبعد كدا يحفظ في الفريزر.
الكفتة المشوية:
بنجيب كيلو الا ربع لحمة حمرا وعليها كيلو لية او سمين بنبشر بصل ونبدا نرش عليها شوية ملح وفلفل ونسيبة شوية ونعصره ونحط علي اللحم تفل البصل ولا نرمي المية بتاعة البصل هنستخدموا تاني. نضيف كمان علي اللحمة قرن شطة وفصين ثوم وشوية برغل منقوعين شوية ومعصورين واضيف ملح وفلفل وبهارات لحمة وزعتر وقرفة ونفرفهم وبعدين نبل ايدينا في مية البصل اللي عليها معلقة صلصة ونصبع الكفتة علي ايد معلقة خشب ونرصهم في طبق فويل ونضعها بالفريزر.
قمر الدين:
نغسل المشمش كويس جدا ونعلي مياه علي النار ونحط فية المشمش بالنوي لمدة 5 دقايق ونصفية ونحطة في مية ساقعة وبعدين نفصصة ونشيل منه النوي ونضربة في الخلاط ونصفية ونرجعة تاني علي النار علي كل كيلو مشمش نضيف نص كوب سكر ونص معلقة ملح ليمون ودي مادة حافظة ونسيبهم علي النار لحد ما يقصر. نعبية في برطمانات وهتفضل معاكي حوالي 3 شهور.
عصير البرتقال:
بنعصر البرتقال ونحطة في اكياس ويحفظ في الفريزر بعد كدا لما نريد استخدامة نقوم باخراجة ووضعة علي رف الثلاجة حتي يسيح ويتم استخدامة.
لحمة بردة:
بنشتري العرق التريبيانكوا ونعمل فية فتحات بالسكينة ونغرز فية فصوص الثوم وندهنة من برة بشوية مسطردة واتبلة بملح وفلفل وبهارات وقرفة وزعتر واربطة كويس بدوبارة ونكون مجهزين ورقة فويل ونفرش عليها ورقة زبدة عشان الفويل غلط لما يلمس الاكل واحط فيها بصلة مقطعة وطماطم وفصين ثوم وجزرة وقرن شطة وورق لوري وحبهان وروز ماري واحط فوقهم عرق اللحمة واقفلة كويس واضعة بالفريزر. ولما احب استحدمة احطوا في مية مغلية وادخلة الفرن يستوي.
الكانتلوب:
بقشرة واقطعة مكعبات واحطة في اكياس ومعاه شوية سكر .
الملوخية:
نقوم بقرطفة الملوخية وغسلها ونسبها تنشف كويس جدا وبعدين نخرطها ومعاها فصين ثوم. ويكون عندك شوربة بردة وكل نص كيلوا ملوخية عليها حوالي مغرفة شوربة وتعبيها في اكياس وتخفظيها.الكرنب:
نسلق الكرنب في مية مغلية وفيها شوية ملح وكمون ونحطة بعد كدا في مية ساقعة ونقطعة ونحطة في طبق فل وعلي الفريزر.
الثوم:
نجيب كمية ثوم ونفرمة ونحط علية شوية ملح وشوية زيت ويتحط في برطمان وعلي الوش شوية زيت وفي ناس تفضل تحطة في اكياس علشان تقدري تاخدي جزء جزء منوا.
بروتوكول نشر التعليقات من الحدث السابع