التسميات [posts7]

إغلاق القائمة

مصيف واجازة في مرسى مطروح

مصيف واجازة في مرسى مطروح
    ملخص مصيف واجازة  مرسى مطروح ... كبسولة تاخدها معاك في رحلة مطروح
    أسعار الشقق تتراوح من 200 جنيه إلى 2000جنيه في اليوم الواحد علي حسب توقيت الذهاب أو المكان أو القرب والبعد من البحر ...
    للناس اللي عايزه تجي تصيف ...اتبع بعض التعليمات ..
    - مطروح مينفعش تروح و ترجع في نفس اليوم , مطروح لازم تخدها 5 ايام علي الاقل .
    - الطريق من القاهره الي مطروح بياخد 5- 6 ساعات (بس فى الطريق الجديد بتاع محور روض الفرج بس الخدمات لسه قليله عليه بس عموما هو أختصر حوالى ساعة  ) ومن الاسكندرية حوالي 3-4
    - وانتا مسافر خلي في جيبك جنيهات فكه علشان دخول الحمام في الاستراحه ب 2 جنيه .

    - الطريق حلو وممتع بالذات اول ما تبدأ طريق الساحل هتقابل عربيات وناس كتير وكافيهات ومطاعم بطول حوالي ١٠٠ كم وبعدهم هتبدأ باقي الطريق لمطروح بمناظر طبيعية للصحراء والجبال والجمال لغاية ما توصل مطروح
    - الشقق في مطروح اسعارها مختلفة خاصه في فصل 7 و 8 , متوسط اسعار الشقق علي البحر من 500  الي 1500في اليوم , صف تاني 300 - 500 متوسط , بعد كده من 500 الغاية ما توصل 200  جنيه في الليله .
    - افضل منطقة للسكن المصيفي في مطروح منطقة العوام وفندق القصر وبعدها الفيروز.
    - اشهر شواطئ مطروح روميل وعجيبة والابيض و كيلوباترا واللجونة وبلو بيتش والبوسيت وشط الغرام و الرميلة مينا حشيش والبسنت
    - الشواطئ الكويسه للاطفال روميل و البسنت المياه مفيش فيها امواج و واطيه.
    - الشواطئ العامه زي الليدو و مطروح العام و روميل مش متوسطة الجودة بالنسبة لشواطئ بقوة عجيبة والغرام والأبيض
    - لازم تروح عجيبه لازم عجيبه ما هو انتا هتروح عجيبه يعني هتروح عجيبه
    - الاماكن الي ممكن تخطف رجلك ليها الابيض و عجيبه و الغرام و كليوبترا واللجونة
    - في سيرك في مطروح بتاع جمال الحلو , هتلاقيه جنب جيلاتي عزه عند فندق المشير احمد بدوي اخر الكورنيش , التذكره ب 60 جنيه , حلو للاطفال مش قد كده للكبار ولو روحته مره متروحش تاني مش هيبقي ليه طعم ولا لون ولا رائحه .
    - عاوز تأكل ايس كريم ؟  عندك جيلاتي عزه الي عند الكورنيش حلو في واحد تاني عند شارع الاسكندريه  وفي  جيلاتي عزة فاتح فرع ثالث جديد بعد القديم اللي عند الاليزية بحوالي 150 متر وفي ايس كريم نيتروجين في شارع الاسكندرية عند بقالة بدر
    - معاك اطفال ؟ مطروح هتبقي حلوه اوي ليهم لان طول ما انتا ماشي علي الكورنيش هتلاقي ملاهي , الملاهي حلوه , دخلهم الملاهي هينبسطوا و هتنبسط معاهم .
    - اكبر ملاهي هتلاقيها جنب جيلاتي عزه في اخر الكورنيش فيها العاب كتير و كبيره ممكن تلعب معاهم انتا كمان يا شقي .
    - في سينما في مطروح , طبعاً مفيش سينما غير سينما واحدة هيه سينما السلام بمركز السلام للقوات المسلحة ، وسط البلد
    طبعاً ده غير سينمات 7D  بتبقي علي الشواطئ بليل بس ودي بيختلف مكانها كل صيف حسب اللي بيعملها
    طبعاً بتبقي زحمة جداً بطبيعة الحال.
    - مينفعش تبقي في مطروح بلد اللب و متجبش لب ابيض من عند النصر الي في علم الروم , بس خد بالك علشان هتلاقي عشرمين محمصه باسم النصر , فاسأل علي محمصه نصر  هتلاقي عليها امم حتي لو الوقت الساعه 4 الفجر
    - اعمل حسابك في ميزانيه مخصصه للكراسي و الشمسيات الاسعار مش هتبقي ثابتة طبعاً ده مش رسمي ده استغلال من الناس لكن كل شط ليه رسوم ثابتة والمفروض انها بتبقي متعلقة في الشط بس طبعاً بتختفي بس طبعاً انت برده ممكن تشتكي لو حسيت ان الاسعار مبالغ فيها.
    عاوز تأكل سمك عليك و علي أسماك أبوشعفة في شارع جانبي جمب الكنيسة في شارع زاهر جلال وفي برضه مجدي مكانه في شارع متفرع من شارع الاسكندريه ناس علي وضعها السمك بتاعها علي وضعه والبلطي بلطي بحر وشديد مشكلتهم التأخير و الزحمه يعني هات معاك كرسي و اعمل حسابك في 3-4 ساعات هتقعد تستني السمك يتعمل بس هتأكل سمك تحلف بيه طول حياتك..
    وعندك حمو التمساح عند بنك مصر في شارع الكنيسة و أبو العربي في وش حمو التمساح
    عاوز تأكل مشويات وأكل عرباوي عندك مطعم كمنه " شارع الجلاء تقاطع شارع الاسكندرية " وأبو سلطان وكوكو العربي " الاثنين في وش بعض بعد حمو التمساح " والأحرار " شارع السيوية فوق محلات السيوية " اكل بدوي بقي من الاخر , حلاوتك يا مندي و انتا معدي , وقعده عرب علي الارض كده و انزلي بالصواني والطواجن ... وخلي بالك من الاسعار ... وبقولك تاني خلي بالك من الاسعار
    بتحب الفرخ ومشوي الفراخ عندك عبده كفتة و مطعم سحر
    عاوز حلو ؟ في حلو يا حبيبي , عندك هريسة احمد حسنين بيعمل هريسه بالبندق اصلي و قدامه الدمياطي هات منه بلح الشام حلو و خطير
    - مطروح الصبح حاجه و بليل حاجه تانيه خالص ♥ , اضرب الحته التمام و انزل بليل استمتع بجمال مطروح و هواء مطروح و عليل مطروح , روح الكورنيش , الكورنيش حلو اضرب ترمس , كل دره , اقعد علي السور الي عند البحر
    اركب بيتش باجي تجربة حلوة و ممتعه معلش سهل مش قصه , ايدك اليمين بنزين ايدك الشمال فرامل زييييييييط يا معلم .
    العجل حلو برضه ابقي ركب الاولاد عجل و اقعد اتفرج عليهم متبقاش بخيل متركبش لوحدك
    الكافيهات حلوه في مطروح و كتير و القعده حلوه في الهواء الطلق و هتلاقي الكافيه الي علي قد الايد و الكافيه الي ممكن يخد ايدك رهن علي ما تجيب الباقي و ترجع كله بالحب .
    - بتحب البلاي ستيشن ؟ في مطروح هتلاقي بلاي ستيشن و قعدات عرب من الاخر حاجه قمه المتعه و علي وضعها .
    - محلات منتجات سيوة في شارع المحكمة القديمة ومحلات سوق ليبيا... زيتون وبلح وعجوة ونعناع زي مانت عايز.... 
    الحدث السابع
    كاتب ومحرر اخبار اعمل في موقع الحدث السابع .

    مقالات متعلقة

    مشاركتك بالتعليق تعنى أنك قرأت بروتوكول نشر التعليقات على الحدث السابع، وأنك تتحمل المسئولية الأدبية والقانونية عن نشر هذا التعليق
    بروتوكول نشر التعليقات من الحدث السابع
    تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.